امیر جماعت اسلامی چترال وجیہ الدین، الخدمت فاؤنڈیشن پاکستان کے جنرل سیکرٹری وقاص انجم جعفری، الخدمت فاؤنڈیشن کے پی کے کے صدر خالد وقاص , ڈائریکٹر الخدمت ایجوکیشن احمد جبران بلوچ، منیجر ایجوکیشن کے پی کے وحید اللہ اور الخدمت فاؤنڈیشن چترال کے صدر عبد الحق نے ویمن وکیشنل سنٹر بمبوریت کا افتتاح کیا۔ اس موقع پر انہوں نے کیلاش قبیلے کی منفرد ثقافت، خوبصورتی، اور روایات کی تعریف کرتے ہوئے اس سنٹر کے قیام کے مقاصد پر روشنی ڈالی۔

ویمن وکیشنل سنٹر کا قیام خواتین کی فلاح و بہبود اور معاشی استحکام کے لئے عمل میں لایا گیا ہے تاکہ کیلاش قبیلے کی خواتین کو درپیش مسائل کے حل اور ان کی ترقی میں معاونت فراہم کی جاسکے۔ اس دورے کے دوران رہنماؤں نے سنٹر میں موجود خواتین سے ملاقات کی، ان کی ہنرمندی اور محنت کی داد دی، اور ان کے لئے بہتر سہولیات کی فراہمی کے عزم کا اعادہ کیا۔





امیر جماعت اسلامی چترال لوئر وجیہ الدین نے اپنے خطاب میں کہا کہ الخدمت فاؤنڈیشن ہمیشہ سے ایسے منصوبوں کی حامی رہی ہے جو معاشرتی ترقی اور خدمت کے اصولوں پر مبنی ہوں۔ انہوں نے اس عزم کا اظہار کیا کہ ویمن وکیشنل سنٹر بمبوریت کے تحت مزید اقدامات کیے جائیں گے تاکہ کیلاش قبیلے کی خواتین خود مختاری کی جانب گامزن ہوں اور اپنی روایات اور ثقافت کو برقرار رکھتے ہوئے معاشی خود کفالت حاصل کر سکیں۔

اس ادارے نے الخدمت فاؤنڈیشن کی جانب سے خواتین کی فلاح و بہبود کے لیے کی جانے والی کاوشوں کو مزید مضبوط کرنے کی راہیں ہموار کی ہیں۔