شاپیرو ہوستہ پژالی              

        نویشاک: عبدالحی 

مشہور روسی مفکر وا دیہو لوٹھورو 





لیو ٹالسٹائی مشہور روسی مصنف، مفکر وا دانشور شوخسی آسور، ہتوعو ادبی خدمات اردو انگریزی وا عربی زبانا ترجمہ بیتی شینی۔ ہتوعو ای ہیا لو دی بو مشہور کی "علاقو لوٹھورو بے حیا، خود غرض انسان کی اوشوئے ہمیشہ علاقو عزت خطرہ بہچور". 

ٹالسٹائیو ہیا اقتباس دی ای متالو شکل اختیار کوری شیر کی "شوم بوس مگم کم ازکم چانگاک وا دھوکہ باز مو بوس" یعنی دھوکہ باز بیک وا چانگاک بیک خور تمام شومیان سور بیرائے۔ حضرت امام جعفر صادق رحمه اللهو مشهور قول شير: "لا داء أدوى من الكذب و الخدع" دهوکہ اوچے چانگیکو سار لوٹ وا کیا لھازی (شومی) نیکی۔ 


اچی تیغار دی بیش کوری ہیہ لہازی  دیہو ای موشورو موژہ کہ اوشوئے تھ تان دُونور، شاپیرو ہوستہ پاژالی ہوئے وا، ہتے دیہو، ہتے علاقو، ہتے معاشرو وا کا بشارو کوروئے، ای کما رویان حال بیکو بش دُوری مئیر کہ نو ہوئے مَدیرِی نو بوئے رے اسونی، دیہو سورچی کہ دیہوتے مئیر بیکو نو بیتائے تھ مَدیری کورار گوئے۔


 انسانو موژا حیا کی اوشویے ہاسے انسانو بو شومیار بچ کوئی، ای حیا دار انسان ہمیشہ خورو عزتو خاص کوری علاقو عزتو بو خیالو لاکھوئے۔ بےحیا خود غرض انسان ہمیشہ تان ذاتو بارا تان دونیر، وا تان ذاتار نیشی نیسی خورو بارا جام سوچ کوریکو سوم ہتوعو دشمنی بوئے۔ 

زمانہ جاھلیتو ای عربی شاعر تان علاقو سردارو بارا ران کی "مہ علاقو لوٹھورو ہانی حیا دار کی کورا گانزولا ای ژور کی یی نیسیتائے ہاسے لوٹھورو شروم اوچے حیو، وا تان منزلتو چے شرفو واجھین تان سورو موڑو دوئے".


کیاوت دی کی ای  انسانو موژا حیا کی نو ہوئے یا ہاتو زندگی چانگیک اوچے دھوکہ، جو نمبری اوچے خیانتار ٹیپ کی ہوئے معاشرو سورا ہے منفی انسانی سلوکو(Negative human behavior)   

شوم اثر پاریر، وا خاص کوری کیا علاقو نویوکو موش کی ہمی غیر انسانی، غیر اخلاقی، غیر شرعی کورمان کی پروشٹا بیتی آریر تھے دیہو جوانان وا ڈاقان دی بے راہ رویو شکار بونی، وا معاشرا نشہ وا ہر قسمو شومی ژاغا گانینی، زاق چیقو موژی تمیز ختم بوئے۔ اولات گاری، وا گرام کھاڑی دی متاثر بوئے۔ ہمو بنیادی وجہ علاقو شوم ہوستہ پرورش بیک، کو ریکو کی دیہو لوٹھورو نوجوان نسلو پروشٹا ہر قسمو شومیا وا خیانتا اوچے چانگیکا، دھوکہ بازی اوچے بدکرداریا کی مڑاغ ہوئے تھے ہے تربیتو چے چھچھیکو مرحلہ آسیرو نوجوان یقیناً ہے شومیان کیا نو جاشور۔


مشہور محدث امام سفیان ثوری رحمہ اللّٰہو ای بو سبق آموز شعرو ای بیت شیر کی" من يُصلِحُ الملحَ إذا الملحُ فسد؟ (تروپ تان کی وے خال ہوئے وا کیاغ تو خال دار کوئے؟)

تُروپوتے ذائقو تَت رینو بویان، ویخال اشناریو خالدار کوریکا تُروپو لوٹ ہوست بویان، تُروپ ویخال ژیبارمانتے خال باژیران، دی خدا نخواستہ ہیہ تُروپ تان کہ ویخال ہوئے ہمو کیہ اشناری خالدار کوئے؟

ہروش تان چقہ ای علاقو ای لوٹھورو تان علاقہ تروپو کردارو ادا کویان ، ہسے ویخال معاشرو خال دار کوروئے، ہسے وے خاسوم رویانتے خاسوم بوئے، ہسے چھوغوؤ کپھالہ شفقتو ہوستو لاکھی تان رحمو امیدو چھاغہ توعو پرورش کوئے، ہسے وے بِیلُو آپاکانتے بِیل بوئے، ہسے بے کردار معاشرہ اخلاقو روشتی بیتی ڑاپھئیر، ہسے قومو پروشٹہ بیتی راہ پاشئیر ، ہسے اخلاقو پَستیو ویشکی بوغدو نوجوانان کردارو ژانگیوتے الوئے ، ژیژاؤ ہتوعو پوشی زندگی شاخسئیک چیچھونی، ژورگینی ہتوعو غیرتو چھاغو موڑا ہال بونی، زاروانان  مُوشٹو موڑتو ویتھوک بوئے، غریبانان باچین شفقتو باد نسیم بوئے۔


دی ہیہ لوٹھورو تان کہ تان قدرو منزلتو ہوش نو کوری روشتیو ژاغہ چھوئی ، کردارو ژاغہ بد کرداری،  صداقتو ژاغہ چانگیک، دیانتو ژاغہ بے ایمانی، شفقتو ژاغہ دوشمنی  غیرتو ژاغہ بے غیرتی کہ بوژیک شروغ اریر، ہتے معاشرہ ژانگیاری پستیو ویشکی سفر کوئے، وا دیہو نوجوان نسل ہوروسار بو شوم سبق گانیر۔ وا ہاش لوٹھورو تان ازیلی دی معاشرہ بو بے راہراو بونی۔ ہاش تاتو سار نہ ازیلی دیانت چھچھور نہ صداقت بلکہ معاشرہ ہر وخت رویان عزتو سوم اشٹوک کوریکو فکرا تان ہال بوئے۔ 

 آتیغین دیتی ہر انسانو وا خاص کوری دیہو لوٹھورو باچین بو ضروری کی ہاسے تان نیک کردار، راست باز، امانت دار وا علاقو عزتو وچے مفاداتان محافظ بلیک تاکہ نوجوان نسلو صحیح تربیت وا راہنمائی بوئے ۔